Маска

Косметикалық құралдардың құрамындағы заттардың үлесіне қарай маскалар емдік (бұларға дәрілік препараттар енеді) және косметикалық (теріні нәрлендіру, тазарту және ағарту үшін қолданылатын) болып екі түрге бөлінеді. Масканы дайын косметикалық кремдерден және түрлі азық-түлік өнімдерінен жасауға болады.

Емдік маскаларды (безеуді, түрлі дақтарды емдеу, беттегі қатайған ісік пен ұйыған қанды тарату үшін) тек қана емдік-косметикалық мекемелереде, косметолог-дәрігердің белгілеуімен жасау керек. Косметикалық масканы үй жағдайында да жасауға болады. Масканы аптасына 2-3 рет жасауға болады.

Майлы теріге мынадай маска қолданылады:

Белок маскасы. Бір жұмыртқаны жарып, оған бірнеше тамшы лимон қышқылын қосып, алынған қоспаны бетке жағады да, құрғаған соң сумен жуып тастайды.

Календула маскасы. Жұқалап алынған мақтаны календуланының тұнбасына батырып алады да (календуланың 1 ас қасығына жарты стакан су қажет), бетке басып 20 минуттай ұстайды. Бұдан кейін бет терісі тітіркенбесе, масканы жумай-ақ, бетті мақтамен сүртіп, үстіне опа (пудра) жағуға болады.

Ашытқы маскасы. Тағамдық ашытқының кішкене бөлігін (15-20 г) сутегі тотығының 3 % ерітіндісіне, айранға немесе суға қою қаймақ тәріздендіріп езеді. Алынған қоспаны қалың етіп бетке жағады. Маска кепкеннен кейін оны жылы сумен жуып тастайды.

         Құрғақ теріге арналған маскалар:

Жұмыртқа маскасы. Жұмыртқаның сары уызын, 1 шай қасық бал, 1 шай қасық қаймақ немесе өсімдік майын қосып араластырады. Қоспаны бетке жағып, 15-20 минут ұстайды да, жылы сумен шайып тастайды.

Ақ ірімшік маскасы. 2 ас қасық ірімшікке 1 ас қасық сүт, 1 шай қасық бал қосып араластырады. Қоспаны бетке жағып, 20-30 минут ұстаған соң жылы суға малынған домақталанған мақтамен (спонджик) сүртіп тастау керек.

         Бет терісі қандай болған күнде де шөптен маска жасауға болады. Бұл үшін майдаланған хош иісті шөптердің (жалбыз, аскөк, шалфей, ромашка, жөке гүлі) әрқайсынан 1 шай қасық көлемінде алып, араластыру керек. Ол ботқа тәрізді болғанша ыстық су құйып алынған қоспаны бетке жағып, сыртынан дәкеден (марля) жасалған дымқыл салфетка жауып, 20-30 минут ұстайды да, кейін сумен шайып тастайды.