Әйел бақыты

Жылына бір келетін әйел қауымының жалғыз мерекесінде барлық әйел баласы жан-жақтан сыйлық алып, нешетүрлі тілек, лебіздер естиді. Сол лебіздердің ішінде ең жиі айтылатыны «Әйел бақытын тілеймін!» деген тілек. Ал сол «Әйел бақыты» дегеніміз не? Оған қалай жетуге болады?
 Әрине, әйел бақыты ол- сүйікті болу, сүйікті жар атану, сәби сүю. Өзіңіз байқап отырғандай бұл бақыт өзі тек ер адаммен байланысты. 
 Жүз жерден сіздің қолыңызда мансап, дәулет, атақ болса да, оның біреуі де әйел бақытының орнын баса алмайды. Ал сол бақыттың сіздің жаныңызда тұрақтап қалып, әрі қарай берік болуы үшін табиғаттың әу бастан ұсынған заңдылығынан бас тартпағаныңыз абзал. Есіңізде ме, Назира Бердалының «Ару-ғұмыр» өлеңіндегі «Мен – әйелмін, сол үшін айыптымын...» деген өлең шумақтары? Міне, сіз өмірге әйел болып келуіңізбен-ақ, өмір жолыңызды айқындап қойғансыз. Сондықтан, бақытқа кеңелем десеңіз, жаныңыздағы ер адамның алдында бұған дейінгі алған білім, дәреже, тәжірибе, сұлулығыңыз бен барлық басым тұстарыңызды ақылмен іште сақтап, оның көкіректік пен менмендікке айналып кетпеуін қадағалап, басым қасиеттеріңізді орнымен көрсеткен жөн.

🌺Сіз ер адамның ырқына көне білгенде ғана, еріңіз үшін қылықтысыз, нәзіксіз;

🌺Сіз төмендеп, ер адам биіктегенде ғана, ол үшін қорғалуы керек аралсыз;

🌺Сіз былапыт сөзден алыс, салиқалы сөздің иесі болғанда ғана, азаматыңыздың қабырғасы, кеңесшісісіз;

🌺Сіз рухани мықты, парасатты болғанда ғана, оның ең жақын досы, оң қолысыз;

🌺Сіздің көңіл-күйіңіз үнемі көтеріңкі, айналаңыз мейрам болғанда ғана, еріңіздің жаны жай табатын панасы мен жұмағысыз;

🌺Сіздің жаныңыз мейірім мен жылулықтан тұрғанда ғана, ол үшін қамқор ана, бауырысыз;

🌺Сіз үнемі ішкі дүниеңізді өсіру жолында болғанда ғана, еріңіз үшін жұмбақ, тың жаңалық, қызықтысыз;

🌺Сізге ер адамның еркі мен шешімі жүріп, ол сіздің жанында өзін нағыз ердей сезіне алғанда ол үшін нағыз әйелсіз, ауадай қажетсіз.
 Есіңізде болсын,ер адамыңызды ақылмен биіктеткеніңіз сіздің жеңілгеніңіз емес, керісінше азаматыңыз арқылы биіктегеніңіз. Әйел бақытына жол ашқаныңыз.