Тиянақты мақсат

Нақты мақсат қоя білу жайындағы тамаша әпсана. 

– Тілекті тіркеу бөлімі, тыңдап тұрмын? 

– Тілек: еркекті қалайды. Ажалды әйел пенде А1Д8К6. 

– Сенің пендең қандай еркекті қалайтынын айтпаған ба? – Сенімді еркекті қалайды. «Қандай жағдайда да қасымнан табылатын» деді. 

– Болды ма? 

– Болды.

 – Дым қиялы жоқ осы адамдардың... Жарайды, келесі өмірінде Сиам егізі болсын деп жазайын. Тілекті тіркеу бөлімі, тыңдап тұрмын? 

– Бала сүйгісі келеді. К18Р3Б46. 

– Қандай бала? 

– Кез келген... шығар... 

– Жынысы? Жасы? Денсаулығы? Сырт әлпеті? Өткен өміріндегі қай дарын-қабілетін қалдырамыз? 

– Ол не ғой... ондай мағлұмат жоқ... 

– Онда маған реніш болмасын... Тіркеу бөлімі, шамасы, мазохистік тілектерді тіркейтін сияқтымыз?... 

– Ақша керек. С4Ж9Ф1. – Қанша? 

– 2 000 000 сом. 

– Неге екі? 

– Солай қалады. 

– Бір миллион жіберемін. Не үшін екенін анықтап, көбірек сұрап үйренсін. Тілекті тіркеу бөлімі, тыңдап тұрмын? 

– Р2000Б14Х9. Ақ марғауды тілейді, үстінде қара дақтары, аяқтары қолғап кигендей, маңдайында жүрек сияқты белгісі бар, өте нәзік марғау болсын, бірге ұйықтайтындай. Себебі: біреумен ойнағысы келеді. 

– Қабылданды. Әйтеу, балаларының қиялы шексіз. Тіркеу бөлімі. Тілек тіркеу ғой. Тыңдап тұрмын? 

– Өзіне жақсы өмір тілейді Ф30М6Ч1.

– Ол үшін «жақсы өмір» деген не екен?

– Өте үлкен, жарқын, жарық бірдеңе... 

– Миыма тек ядролық жарылыс кеп тұрғаны... Жоқ! Қабылданбайды. Ақымақтар. Сосын тағы да тілегім орындалмады деп ойбайлайды ғой... Тілек тілегенді де білмейді бұл адамдар... Үйрену керек қой! 

Аударған Шынар Әбілдә