Негізгі элементтердің пайдасы

Биоқоспалар құрамы көптеген дәрумендер мен минералдарға бай. Дәрумендердің ағзаға қаншалықты пайдалы екенін білгенімізбен, Менделеев кестесіндегі химиялық элементтердің ағзамызға не үшін қажет екенін нақты біле бермейміз. Мұндай элементтер бізге не үшін қажет.

НАТРИЙ – ЖЕМІС-ЖИДЕКТЕР МЕН АС ТҰЗЫНДА КӨП

Натрий – қан қысымын қалыпқа келтіретін бірден бір элемент. Қан қысымы қалыпты болмаған жағдайда, адамға ауа-райының тез құбылуы әсер етіп бас жиі ауыратын болады. Сонымен бірге, натрий бойдағы әлсіздіктен арылтып, қуат-күш береді.

ФОСФОР – ІРІМШІК, СҮЗБЕ, ЕТ ПЕН БАЛЫҚТА КӨП

Жүйке жүйесінің дұрыс жұмыс істеуі мен жасушалардың дамуына фосфордың септігі мол. Тағамның ешбір түрі күн сайын таңертеңгілік жеген сүзбе мен ірімшіктің орнын баса алмайды.

МАГНИЙ – ЖАҢҒАҚ, БАЛ, ТЕҢІЗ ӨНІМДЕРІ МЕН ДӘНДІ ДАҚЫЛДАРДА БОЛАДЫ

Ағзаға түрлі дәрумендер мен минералды элементтер магний арқылы сіңеді. Сондықтан тамақ рационына магнийді кеңірек пайдалану керек. Мәселен дәнді дақылдардан жасалған тамақтан соң, жаңғақ пен бал қосылған басытқы (десерт) жеген жөн.

ТЕМІР – ТӘТТІ БҰРЫШ, КЕПТІРІЛГЕН ӨРІК, ҚЫРЫҚҚАБАТ ПЕН ҚАРА ӨРІКТЕ МОЛ

Темір – ең маңызды микроэлементтердің бірі. Темірдің жетіспеуінен қаназдық ауруы (анемия) пайда болады. Соның салдарынан адамның ағзасы тез әлсірегіш, шаршағыш келеді. Темір арқылы әрбір жасушаға қажетті оттегі жетіп отыратынын да ұмытпаған жөн.

Мәліметтер алынған дереккөздер: Қазақстан әйелдер журналы. №07-08.2020. (шілде/тамыз)